حد بيكتب خواطر
سعات سعات بكتب عشان متكلمش بستغرب لما الناس تحكيلي في المدرسة ثم الشغل و اقول يا بختهم انهم مش معقدين و بيطلعوا الي جواهم و بسمع و بيرتاحوا مش عشان اتكلموا قد ما عشان قدروا يتكلموا و يفهموا هما حاسيين بايه و بعد كدة جربت اعمل كدة انا كمان بس بندم ندم شنيع يمكن عشان كبرت علي اسلوب الكتمان بعرف اعبر لكن بكره اعبر بحس اني بعترف و ده احساس مقزز لو بتجربه جديد، برضه برضه انا مش ببني صورة خيالية لاني مثالي عدم الكلام و التعبير مش من احساس بالعظمة و التميز علي قد ما هو حاجة غير مريحة و بعترف اني بغلط و بتعلم لكن عمري ما قدرت اقول بفكر في ايه و متضايق عشان او مبسوط عشان و التحسن الي جي من الانعكاس الي انا بعمله لوحدي بحس انه ضئيل بكتشف انه اسهل لو مكنتش بعمل ده لوحدي.
بكتب بدل ما احكي بدل ما اورط حد معايا ولا صاحب غبي ولا زميل مثقف ولا اهل ولا حتي حلاق كله تمام و سلام، في حالة واحدة كسرت القاعدة دي و هي سواق التاكسي يمكن عشان بنتحرك و يمكن عشان هما بيعرفوا يتكلموا معرفش بس هما انا بطريقة او بأخري ممكن يكون نازل من بيته متخانق و جعان و شاذ و ملحد و يقولك اهلي و زمالك و يرغي في الي حصل امبارح و يسمع رأيك و يعرص و كل ده عشان يفصل نفسه حتي لو شوية عشان يحس انه موجود زي كدة بالظبط عايز احس اني موجود بس مش هنا عايز احس اني متواصل مع حد مش هشوفه تاني و عايز اتكلم بس مبقاش مسموع اتشاف بغموض كافي اني مبقاش مكشوف، الكتابة و الكلام جزئ من المأساه الي هو الوعي فيها تضييع وقت و دي اهم ميزة بالنسبالي و فيها الحفر الي ملهاش اخر و دواير بس ده رأي و ممكن يبقي غلط غلط جدا لدرجة ان العكس يبقي صحيح و ابقي متشاف عريان مش من الكل بس علي الاقل من الي بيعوا كفاية هيعرفوا من الاسلوب لوحده و يشوفوا ماضي و مستقبل بدرجه عالية من الدقة و هيفكروا بصمت و من غير تدخل للاسف.
سعات سعات بفكر ليه انا لسا دايخ من يوم ما اتولدت و ليه بدوخ نفسي اكتر كاني مش مرتاح هنا و مش قادر اتعامل بشكل مباشر و ليه بقرف من الناس الي عندها هدف و بتتعب عشانه و بقول و انت عرفت منين انك صح و ليه انا قرفان و هرجع من الثقة و التفاؤل الي بشوفه في ناس طب ليه بحس بعدم تصنع و صدق و راحة مع الضايعين و الفاشلين ليه بشوف في الجدول العبودية و بنسي النظام و تحقيق اهداف متعددة في وقت واحد و يمكن الذكاء في التنظيم و ليه بشوف الحرية في تضييع الوقت و عدم الاتفاق علي شئ معين و بنسي اني كدة ضايع للابد.
عايز اعيش عن قصد و اجرب بنفسي يمكن تنفع قصدي اكيد هتنفع.
